Արթուր Գրիգորյան

Ծնվել է Երևանում: 1965-75թթ. սովորել է Երևանի թիվ 34 միջնակարգ դպրոցում, զուգահեռ՝ Երևանի Տ.Չուխաճյանի անվան երաժշտական դպրոցի դաշնամուրային, այնուհետև` կոմպոզիցիայի դասարանում: 1975-79թթ. սովորել է Երևանի Ռ.Մելիքյանի անվան երաժշտական ուսումնարանում: 1976-78թթ.՝ Օրջոնիկիձեի շրջանի պիոներ պալատի էստրադային խմբի ղեկավար: 1981-83թթ. և 1987թ-ից Արթուր Գրիգորյանը դասավանդել է «Հայհամերգ» էստրադային ստուդիայում: 1983-84թթ. աշխատել է գեղագիտական կենտրոնում: 1984-91թթ. սովորել է Մոսկվայի թատերական արվեստի պետական ինստիտուտում: 1985-88թթ. եղել է «Պոպուլյար» ՎԳԱ-ի երաժիշտ: 1992թ. նշանակվել է Հայաստանի ազգային ֆիլհարմոնիկ գործակալության նախագահ, իսկ մինչ 1994թ. եղել է Հայաստանի պետական ջազ նվագախմբի գեղարվեստական ղեկավարը: 1994թ-ից հիմնադրել և ղեկավարում է Հայաստանի Երգի պետական թատրոնը: 1995-98թթ. եղել է Երևանի Երիտասարդական պալատի տնօրենը: 2001թ-ից հանդիսանում է Հայաստանի հանրային հեռուստառադիոընկերության խորհրդի անդամ, 2009թ-ից` խորհրդատու: Նախաձեռնել և ղեկավարել է Երևանի գեղարվեստաթատերական ինստիտուտի էստրադային կուրսը: Հեղինակել է բազմաթիվ երգեր, մանկական մյուզիքլներ, մասսայական միջոցառումներ, փառատոներ, թեմատիկ, էստրադային համերգներ, հեռուստահաղորդումներ, նախագծեր: Պարգևատրվել է Հայաստանի և Արցախի պետական շնորհակալագրերով և մրցանակներով: 1996թ. պարգևատրվել է ՀՀ «Մովսես Խորենացի», 2005թ.` Արցախի «Վաչագան Բարեպաշտ», 2008թ.` Առաջին աստիճանի մեդալներով: 2003թ. արժանացել է Հայաստանի արվեստի վաստակավոր գործչի, 2011թ.` Հայաստանի ժողովրդական արտիստի կոչման: