Դանիել Երաժիշտ

Ծնվել է Երևանում: Գրիգոր Երաժիշտը (Գրիգոր Դանիելյան) ավարտել է Երևանի Պ.Չայկովսկու անվան երաժշտական դպրոցի ջութակի դասարանը: 1964թ. ընդունվել է Երևանի Կոմիտասի անվան պետական կոնսերվատորիայի լարային բաժին (Ժան Տեր-Մերկերյանի դասարան): 1971թ. ավարտել է նույն կոնսերվատորիայի երաժշտագիտական (ղեկավար` Ռոբերտ Աթայան), 1974թ.՝ օպերային-սիմֆոնիկ դիրիժորության (ղեկավար` պրոֆեսոր Միքայել Մալունցյան) բաժինները: 1982-85թթ. սովորել է Մոսկվայի Պ.Չայկովսկու անվան կոնսերվատորիայի ասպիրանտուրայում: 1967-69թթ. դասավանդել է Երևանի Տ.Չուխաջյանի անվան երաժշտական դպրոցում, 1966-72թթ.` Ա.Բաբաջանյանի անվան, 1973թ.` Լենինականի (այժմ՝ Գյումրի), 1974-77թթ.` Կապանի երաժշտական ուսումնարաններում: 1977-79թթ. եղել է Լենինականի պետական կամերային նվագախմբի գեղարվեստական ղեկավարը: 1980-81թթ.` Հայաստանի պետական սիմֆոնիկ նվագախմբի դիրիժորի ասիստենտ: 1982թ-ից աշխատել է Երևանի Կոմիտասի անվան պետական կոնսերվատորիայի ժողովրդական ստեղծագործության բաժնում` որպես նվագախմբի ղեկավար և դիրիժորության դասախոս, 1993թ-ից՝ կամերային անսամբլի, այնուհետև՝ լարային կվարտետի ամբիոնում (2016թ-ից՝ պրոֆեսոր): 1997թ-ից աշխատում է նաև Հոգևոր երաժշտության պետական կենտրոնում, որտեղ 2006-07թթ.` կենտրոնի երգչախմբի դիրիժոր: Հայաստանում առաջինն է հիմնադրել և ղեկավարել հոգևոր երաժշտության համույթներ: Համերգներով հանդես է եկել Մոսկվայում, Լենինգրադում, Ռումինիայում, Բուլղարիայում, Ավստրիայում, Հոլանդիայում, Սլովենիայում: Մասնակցել է միջազգային փառատոններին: Հայաստանում առաջինն է նվագել բլոկֆլեյտա: Դանիել Երաժիշտը հեղինակ է 400-ից ավելի երաժշտագիտական հոդվածների, էսսեների, «Երգեհոնային գրքույկ» ժողովածուի համահեղինակն է: 2001-09թթ. հրատարակվել է նրա «Հայաստանը երգերում» քառհատորյա ժողովածուն, որը պարունակում է հոգևոր, ժողովրդական, ազգային-հայրենասիրական երգերի մշակումներ: 2011թ. Դանիել Երաժիշտը արժանացել է Հայաստանի արվեստի վաստակավոր գործչի կոչման, 2016թ.՝ ՀՀ մշակույթի նախարարության ոսկե մեդալի: