Գուրգեն Միրզոյան

Ծնվել է Թիֆլիսում: Սովորել է Ներսիսյան դպրոցում, աշակերտել Գրիգոր Սյունուն: 1924 թ-ին ավարտել է Թիֆլիսի կոնսերվատորիան, դասատուներ՝ Մ․ Մ․ Իպոլիտով-Իվանով (ստեղծագործություն), Քրիստափոր Քուշնարյան (պոլիֆոնիա)։ 1937-1939 թթ. ղեկավարել է Հայֆիլհարմոնիայի ժողովրդական գործիքների նվագախումբը։ 1941-1943 թթ-ին եղել է Ռոմանոս Մելիքյանի անվան ուսումնարանի տեսական առարկաների դասատու, 1950-1958 թթ-ին՝ նաև ուսումնական մասի վարիչ։ Միրզոյանի նախաձեռնությամբ երաժշտական ուսումնարանում կազմակերպվել է արևելյան գործիքագիտության և գործիքավորման դասընթաց։ Գրել է սիմֆոնիկ, դաշնամուրային երկեր, լարային կվարտետ, կոնցերտ թառի, ֆանտազիա քամանչայի, ստեղծագործություններ ժող․ գործիքների նվագախմբի համար, երգեր, խմբերգեր։ Միրզոյանը պարգևատրվել է «Պատվո նշան» շքանշանով, 1950 թ-ին արժանացել է ՀԽՍՀ արվեստի վաստակավոր գործչի կոչմանը։ Մահացել է Երևանում: