Համբարձում Բերբերյան

Ծնվել է Արևմտյան Հայաստանի Ադանա քաղաքում: 1915թ. հայկական ջարդերի ժամանակ գաղթել է Սիրիայի Հալեպ քաղաք, ապա` Աթենք: 1930թ. ավարտել է Աթենքի կոնսերվատորիայի ջութակի և ստեղծագործական բաժինները, ապա` կատարելագործվել Փարիզում: 1923թ. Աթենքում տեղի է ունեցել առաջին համերգը: Ապա համերգներով հանդես է եկել Մերձավոր Արևելքի երկրներում, ԱՄՆ-ի տարբեր քաղաքներում: 1931թ. եղել է Կիպրոսի Հելենիկ կոնսերվատորիայի դեկանը: 1945թ. Կիլիկիայի կաթողիկոս Գարեգին 1-ինի հրավերով տեղափոխվել է Լիբանան, որտեղ դասավանդել է հայկական դպրոցներում և Բեյրութի պետական կոնսերվատորիայում: 1962թ. տեղափոխվել է ԱՄՆ: Հեղինակել է մի շարք սիմֆոնիկ ստեղծագործություններ: Հայաստանում հանդես է եկել հեղինակային համերգներով: 1970թ. նշանակվել է ԱՄՆ-ի և Կանադայի հայ գաղթօջախների, Հայկական բարեգործական ընդհանուր միության երաժշտական ընդհանուր տնօրեն: 1981թ. Հայաստանի կոմպոզիտորների միության կողմից արժանացել է Կոմիտասի անվան մրցանակի: Մահացել է ԱՄՆ-ի Մասաչուսեթս նահանգում: