Հասմիկ Լեյլոյան

Ծնվել է Երևանում: Միջնակարգ երաժշտական կրթություն ստացել է Երևանի Ա.Տիգրանյանի անվան երաժշտական դպրոցում: Ավարտել է Ռ.Մելիքյանի անվան երաժշտական ուսումնարանը, իսկ 1982թ.՝ Երևանի Կոմիտասի անվան պետական կոնսերվատորիան՝ Խաչատուր Ավետիսյանի դասարանը: Եղել է ժողովրդական նվագարանների ամբիոնի առաջին շրջանավարտը: 1982թ-ից դասավանդում է կոնսերվատորիայի ժողնվագարանների ամբիոնում (2004թ-ից՝ պրոֆեսոր): Դասավանդել է նաև Երևանի մի շարք երաժշտական դպրոցներում: 1974-99թթ. եղել է Հայ ֆիլարմոնիայի, 1999-2002թթ.՝ Հայաստանի ռադիոյի և հեռուստատեսության էստրադային սինֆոնիկ նվագախմբի մենակատար: Համագործակցել է տարբեր նվագախմբերի հետ, համերգներով հանդես է եկել աշխարհի բազմաթիվ երկրներում: Միջազգային և հանրապետական մի շարք մրցույթների դափնեկիր է: Հեղինակել է քանոնի բազմաթիվ ժողովածուներ և ձեռնարկներ: 2015թ-ից դասավանդում է նաև Երևանի Խ.Աբովյանի անվան պետական մանկավարժական համալսարանում: 2007թ. Հասմիկ Լեյլոյանը արժանացել է Հայաստանի վաստակավոր, 2013թ.` ժողովրդական արտիստի կոչման, 2014թ.՝ Երևանի քաղաքապետարանի ոսկե մեդալի, 2016թ.՝ Մեծ միջազգային հանրագիտարանի մեդալի և առաջին կարգի դիպլոմի: