Հենրիկ Իգիթյան

Ծնվել է Թբիլիսիում: Միջնակարգ կրթությունը Հենրիկ Իգիթյանը ստացել է Երևանի Կիրովի անվան թիվ 12 դպրոցում: 1956թ. ավարտել է Երևանի Վ.Բրյուսովի անվան ռուսաց և օտար լեզուների ինստիտուտի բանասիրական ֆակուլտետը, 1963թ.` Լենինգրադի գեղարվեստի ակադեմիայի արվեստաբանական ֆակուլտետը: 1960-71թթ. աշխատել է Հայաստանի ազգային պատկերասրահում: 1970թ. հիմնադրել է աշխարհում առաջին մանկական պատկերասրահը (Ժաննա Աղամիրյանի հետ), 1972թ.` Երևանի Ժամանակակից արվեստի թանգարանը, 1978թ.` մանուկների գեղագիտական դաստիարակության հանրապետական կենտրոնը, 1994թ.` «Նոյյան տապան» հայ արդի նկարիչների ընկերակցությունը: Հեղինակ է բազմաթիվ մենագրությունների, ալբոմների, արվեստաբանական հոդվածների: Հենրիկ Իգիթյանը պարգևատրվել է Խաչատուր Աբովյանի անվան, 1999թ.՝ ՀՀ «Մովսես Խորենացի», 2001թ.՝ Արցախի «Մխիթար Գոշ» մեդալներով, 2005թ.՝ Լոս Անջելեսի համալսարանի ոսկե մեդալով: 1980թ. արժանացել է Հայաստանի արվեստի վաստակավոր գործչի, 2004թ.` Երևանի պատվավոր քաղաքացու կոչումներին: Մահացել է Երևանում: