Սիմոն Հովհաննիսյան

Ծնվել է Երևանում։ 1958թ․ Սիմոն Հովհաննիսյանը ոսկե մեդալով ավարտել է միջնակարգ դպրոցը և Սայաթ-Նովայի անվան յոթնամյա երաժշտական դպրոցը։ 1958-1961թթ․ սովորել է Ռ․Մելիքյանի անվան երաժշտական ուսումնարանում, 1958-1963թթ․՝ Երևանի պետական համալսարանի պատմության ֆակուլտետում, 1961-1966թթ․՝ Երևանի Կոմիտասի անվան կոնսերվատորիայի ստեղծագործական բաժնում (Է. Միրզոյանի դասարան)։ 1957թ-ից Սիմոն Հովհաննիսյանը Հայաստանի կույրերի միավորման անդամ է։ 1977թ-ից՝ Հայաստանի կույրերի միավորման վարչության անդամ։ 1957-1963թթ․ Սիմոն Հովհաննիսյանը աշխատել է որպես տնայնագործ բանվոր։ 1963-1976թթ․՝ երաժշտական խմբագիր ՀԿՄ հրատարակչությունում։ 1976-2018թթ․՝ ՀԿՄ երաժշտական կոլեկտիվների գեղարվեստական ղեկավար-տնօրեն։ 1966թ․՝ Հայաստանի և ԽՍՀՄ կոմպոզիտորների միության անդամ։ 1984-2014թթ․՝ Հայաստանի կոմպոզիտորների միության վարչության անդամ։ Սիմոն Հովհաննիսյանի ստեղծագործությունները բազմիցս տպագրվել են տարբեր հրատարակչությունների կողմից։ 1969թ․ ԽՍՀՄ երիտասարդ կոմպոզիտորների 3-րդ մրցույթում (Մոսկվա) նա արժանացել է դափնեկրի կոչման: Մի շարք հանրապետական և միջազգային մրցույթների դափնեկիր է։ Սիմոն Հովհաննիսյանի ստեղծագործությունները կատարվել են Հայաստանում, Ռուսաստանում, ԱՄՆ-ում, Իտալիայում, Անգլիայում, Գերմանիայում, Ուկրաինայում, Չեխոսլովակիայում և այլն։ 1990թ․ Սիմոն Հովհաննիսյանը արժանացել է Հայաստանի արվեստի վաստակավոր գործչի կոչման։ 2005թ․ արժանացել է Հայաստանի կույրերի միավորման «Պատվավոր անդամ» կոչման։ 1982թ․ թողարկվել է հեղինակային ձայնապնակ «Մելոդիա» ֆիրմայի կողմից։ 2010թ․ արժանացել է «Մովսես Խորենացի» և Մշակույթի նախարարության մեդալներին։