Վահան Անդրեասյան

Ծնվել է Երևանում։ Ավարտել է Խ․ Աբովյանի անվան մանկավարժական ինստիտուտի կուլտուրայի ֆակուլտետի ռեժիսորական բաժինը։ Ուսումնասիրել է նաև տաղաչափություն, երաժշտական հարմոնիա, կոմպոզիցիա։ Աշխատել է մի շարք թատրոններում, ազգային հեռուստատեսությունում որպես ռեժիսոր։ Հեղինակ է բազմաթիվ երգերի, գործիքային ստեղծագործությունների, թատերական երաժշտության, հեռուստաֆիլմերի, ներկայացումների, հեռուստա և ռադիոբեմադրությունների։ Երգերի տեքստեր է գրել տարբեր երգահանների համար։ 2003 թ-ից Վահան Անդրեասյանը Հայաստանի գրողների միության անդամ է։ Ավարտել է նաև Մայր Աթոռ Սուրբ Էջմիածնի քահանայի պատրաստման լսարանը։ Սուրբ Սարգիս եկեղեցում ձեռնադրվել է սարկավագ (2004), ապա Սուրբ Գրիգոր Լուսավորիչ եկեղեցում՝ քահանա և ստացել տեր Թովմա հոգևոր անունը։ Որպես քահանա ծառայել է Արարատյան թեմում (2004-2007), Հրվ. Ռուսաստանի թեմում, եղել է Ադիգեայի Հայ առաքելական եկեղեցու հոգևոր հովիվ (2007-2010), ապա վերադարձել է Արարատյան թեմ՝ Երևան (2010 թ-ից սկսած)։ Նրա ստեղծագործությունները տպագրվում են գրական մամուլում։ Թարգմանվել է ֆրանսերեն, ռուսերեն, գերմաներեն և տպագրվել Փարիզում, Բեռլինում։ 2002 թ-ին արժանացել է Սայաթ-Նովա մրցանակաբաշխության մրցանակի «Բարին կհաղթի» երգի երաժշտության և տեքստի համար։ 1997 թ-ին՝ «Արծաթե բանալի» մանկական երգի փառատոնի մրցանակին լավագույն տեքստի համար, 1992 թ-ին արժանացել է «Ասուպ» մրցանակաբաշխության դափնեկրի կոչման՝ որպես տարվա լավագույն երգերի տեքստերի հեղինակ։ 2019 թ-ին արժանացել է Սարգիս Գոգորյանի պոեզիայի համար սահմանած մրցանակին: 2024 թ-ին արժանացել է «Ներսես Մեծ» մրցանակաբաշխության մրցանակին պոեզիայի անվանակարգում: