Ամպն ու սարը

Ծնվել է Երևանում։ Նախնական երաժշտական կրթությունը ստացել է ջութակի դասարանում, այնուհետև ավարտել է Ռոմանոս Մելիքյանի անվան երաժշտական ուսումնարանի կիթառի բաժինը։ Ութսունականների վերջին տեղափոխվել է բնակության Բրյուսել, որտեղ ավարտել է Թագավորական կոնսերվատորիայի կիթառի բաժինը։ Որպես կիթառահար համագործակցել է բելգիական մի շարք խմբերի հետ։ 2004 թվականին դուդուկահար Վարդան Հովհաննիսյանի հետ միասին հիմնադրել է հայ-բելգիական «Արաքս» խումբը՝ ներգրավելով նաև բելգիացի երաժիշտների։ Խումբը 2004, 2009 և 2024 թվականներին ձայնագրել է երեք ձայնասկավառակ, որտեղ տեղ են գտել հայկական մեղեդիներ` Տ. Տեր -Ստեփանյանի գործիքավորմամբ։ Սկավառակները մեծ հաջողություն ունեն երաժշտասերների մոտ, արաքսյան մշակումներն օգտագործվում են ամենատարբեր ֆիլմերի, հաղորդումների, միջոցառումների երաժշտական ձևավորման մեջ ամբողջ աշխարհում։ «Արաքս»-ը բազմաթիվ համերգներ է ունեցել հայաստանյան և եվրոպական տարբեր բեմերում։ Ութսունականներից սկսած` Տիգրանն ակտիվորեն համագործակցել է Ռուբեն Հախվերդյանի հետ՝ որպես նվագակցող կիթառահար, մասնակցել է նրա ալբոմների ձայնագրությանը, հանդես եկել նրա համերգներին աշխարհի բազմաթիվ բեմերում։ Նվագակցել է շատ այլ կատարողների ևս՝ Հայաստանում և արտերկրում։ 2012 թ-ից ի վեր համատեղ երաժշտական նախագծեր է իրականացնում երգահան, կատարող Լիլիթ Բլեյանի հետ՝ ձայնագրելով մի շարք ձայնասկավառակներ՝ որպես կիթառահար և գործիքավորող, հանդես գալով համերգներով։