Ասում են թե

Ծնվել է Երևանում: 1969-79թթ. սովորել է Երևանի Ե.Չարենցի անվան թիվ 67 միջնակարգ դպրոցում: Ավարտել է Երևանի պետական պոլիտեխնիկական համալսարանի էլեկտրատեխնիկական ֆակուլտետը: 1988թ. սկսել է երաժշտական գործունեությունը` կոմպոզիտոր Արթուր Գրիգորյանի աջակցությամբ: 1989թ. Տալլինում Վահագն Հայրապետյանի հետ հանդես է եկել մենահամերգով: 1992թ. Արթուր Գրիգորյանի և Տաթևիկ Հովհաննիսյանի հետ Լոս Անջելեսում հանդես է եկել համերգային ծրագրով, իսկ 1996թ. ներկայացել է համերգով Էլվինա Մակարյանի հետ: 1998թ. արժանացել է Հայաստանի ազգային երաժշտական մրցանակաբաշխության «Տարվա լավագույն երգիչ» մրցանակին: 1999թ.-ին թողարկել է առաջին «Colors of StevieLand» ձայնասկավառակները: Լոս Անջելեսի հայկական ամենամյա երաժշտական մրցանակաբաշխության ժամանակ նրա թողարկած սկավառակներից չորսը արժանացել են «Տարվա լավագույն ալբոմ» մրցանակին (2001թ., 2003թ., 2005թ., 2008թ.), արժանացել է նաև մի շարք այլ երաժշտական մրցանակների: Համերգային ծրագրերով հանդես է եկել Հայաստանի մարզերում, Արցախում, ԱՄՆ-ում և այլուր: 2010թ. Մոսկվայում մասնակցել է «Կարոտ» փառատոնին և արժանացել մրցանակի: Բազմիցս ելույթներ է ունեցել Հայաստանի պետական ջազային և Հայաստանի հանրային ռադիոյի և հեռուստատեսության էստրադային սիմֆոնիկ նվագախմբերի հետ: 2002թ. եղել է Արտեմի Այվազյանի 110-ամյակին նվիրված ֆիլմ-համերգի պրոդյուսերը: Նկարահանել է մի շարք տեսահոլովակներ, իսկ 2004թ.՝ շուրջ 30 րոպե տևողությամբ կինոհամերգ՝ «Կարինե», «Երևան», «Երանի թե», «Ուշացած ժամադրություն» երգերի հիման վրա: Ունի ավելի քան 4000 հին ձայնասկավառակների հավաքածու: 2017 թ-ից աշխատում է Հայաստանի Հանրային ռադիոյի ֆոնդավորման և թվայնացման բաժնի ղեկավար: 2018թ-ից Երևանի ավագանու անդամ է: