Երգի հեղինակներ
- Տարի
- 1997
- Տևողություն
- 30:04
- Կատարող
- Ալբերտ Զուրաբյան, Ջիմ Թորոսյան
- Ռեժիսոր
- Սիլվա Յուզբաշյան
Կենսագրություն
Ջիմ Թորոսյան
Ծնվել է Երևանում: Ջիմ Թորոսյանը 1949թ. ավարտել է Երևանի պոլիտեխնիկական ինստիտուտը, 1954թ.` Մոսկվայի ճարտարապետական ակադեմիան: 1954թ-ից դասավանդել է ԵրՊԻ-ում (1979թ-ից` պրոֆեսոր): 1962-64թթ. եղել է Հայաստանի ճարտարապետների միության վարչության նախագահի տեղակալը, 1971-81թթ.` Երևանի գլխավոր ճարտարապետը, 1958թ-ից` «Երևաննախագիծ» ինստիտուտի ճարտարապետական արվեստանոցի ղեկավարը: 1989-90թթ. ղեկավարել է Սպիտակի երկրաշարժից հետո Հայաստանի տուժած շրջանների վերակառուցման հանձնաժողովի խորհուրդը: Նրա և համահեղինակների նախագծերով Երևանում կառուցվել են Սրտաբանության ԳՀԻ համալիրը (1964-69թթ.), Այրարատյան թագավորության ոսկեհուռ տարբերանշանով Հայաստանի հավերժող պետականությունը խորհրդանշող հուշարձան-կոթողը (1967թ.), մետրոպոլիտենի «Հանրապետության հրապարակ» կայարանը` վերգետնյա և ստորգետնյա կառույցների համալիրով (1981թ., ՀՀ Պետական մրցանակ` 1983թ.), Ժամանակակից արվեստի թանգարանը (1982-85թթ.), «Հայաստան» հուշահամալիրը («Կասկադ», 1980-2004թթ.)` ցուցասրահների, ցուցադրաբակերի, շատրվանների համակարգով, Զարգացման հայկական բանկը (1995թ.), քաղաքապետարանը` մայրաքաղաքի պատմության թանգարանով (2004թ.), ինչպես նաև Սպիտակի կենտրոնական հրապարակի համալիրը (1998-2005թթ.), Մայր Աթոռ Սբ. Էջմիածնի մուտքը և բացօթյա խորանը (2001թ.) և այլն: Ճարտարապետության և մոնումենտալ արվեստների համադրումով են առանձնանում նրա հուշակոթողները, հուշարձանները, տապանաքարերը, մահարձանները, հուշաքարերը և այլն: Ճարտարապետի ստեղծագործությունները ցուցադրվել են ճարտարապետության միջազգային կոնգրեսներում: Անհատական ցուցահանդեսներ է ունեցել Երևանում (1965թ., 1976թ., 1996թ.), Թբիլիսիում (1967թ.), Մոսկվայում (1983թ., 1997թ.), Լենինգրադում (1983թ.): 1982թ. արժանացել է Համամիութենական ստուգատեսի «Տարվա լավագույն ստեղծագործություն» ոսկե, 1998թ.` ՀՀ «Անանիա Շիրակացի» մեդալների: 2003թ. դարձել է Երևանի, 2004թ.` Սպիտակի պատվավոր քաղաքացի: 1983թ-ից եղել է ՌԴ գեղարվեստի ակադեմիայի, ապա` Ճարտարապետության միջազգային ակադեմիայի (1993թ-ից` պրոֆեսոր) Մոսկվայի մասնաճյուղի (1992թ.) ակադեմիկոս: 1968թ. արժանացել է Հայաստանի վաստակավոր, 1988թ.` ԽՍՀՄ ժողովրդական ճարտարապետի կոչման: Մահացել է Երևանում: