Ցանկալի պահ

Ծնվել է Ալթայի երկրամասի Բառնաուլ քաղաքում։ Հայրը՝ Հովհաննես Վերանյանը եղել է նշանավոր խմբավար, Հայաստանի վաստակավոր արտիստ, ով նրա առաջին ուսուցիչն էր։ 1966-1970 թթ. Արթուր Վերանյանը սովորել է Ռ. Մելիքյանի անվան երաժշտական ուսումնարանի ջութակի դասարանում (դասատու՝ Հենրի Սմբատյան)։ 1975 թ-ին ավարտել է Երևանի Կոմիտասի անվան կոնսերվատորիայի խմբավարական բաժինը (Թաթուլ Ալթունյանի և Հովհ. Չեքիջյանի դասարան)։ Ա. Վերանյանը կատարելագործվել և վարպետության դասեր է վերցրել Մոսկվայում Վլ. Մինինի (1981թ.), Գուստավ Էրնեսաքսի (Տալին, Էստոնիա, 1988թ.), Իմանտս Կոկարսի (Ռիգա, Լատվիա, 1981), Վլադիմիր Սոկոլովի, Ալ. Չերնուշենկոյի, Բորիս Տևլինի, Գ. Ռոժդեստվենսկու մոտ։ 1986-1990 թթ. սովորել է օպերային և սիմֆոնիկ նվագախմբերի խմբավարական բաժնում (պրոֆ. Յուրի Դավթյանի դասարանում)։ Ավելի քան տասնյակ միջազգային մրցույթների դափնեկիր է՝ Էստոնիա, Իտալիա, Իսպանիա, Գերմանիա, Ավստրիա և այլն)։ 1983-1991 թթ.՝ Երևանի Կոմիտասի անվան կոնսերվատորիայի պրոֆեսոր։ Հիմնադրել և ղեկավարել է մի շարք երգչախմբեր՝ Հայաստանի Երգչախմբային ընկերության դիրիժոր (1973-1978թթ.), «Երևան» կանանց կամերային երգչախումբ (1976-1991թթ.), Երևանի Սայաթ-Նովա երաժշտական դպրոցի մանկական երգչախմբի դիրիժոր (1973-1991թթ.), Հայաստանի Ակադեմիական երգչախմբի գլխավոր դիրիժոր (1990-1991թթ.), «Երևան» կանանց երգչախումբ (Լոս-Անջելես, Կալիֆորնիա, 1992-1994թթ.), Բերկլիի երաժշտական քոլեջի երգչախումբ (Բոստոն, 1997-1998թթ.), «Էրեբունի» երգչախմբի հիմնադիր և գեղ. ղեկավար (Բոստոն, 1994թ-ից մինչ այսօր), Սուրբ Պողոս հայկական եկեղեցու երգչախմբի ղեկավար (Ուոթերթաուն, Մասաչուսեթս, 1994թ-ից մինչ այսօր), Ավե Սոլ Արվեստի կենտրոնի հիմնադիր և տնօրեն (Ուոթերթաուն, Մասաչուսեթս, 2000-2005 թթ.), Նյութոն Մոնթեսորի կենտրոնի երաժշտական ղեկավար (Նյութոն, Մասաչուսեթս, 2006թ-ից մինչ այսօր)։ Նրա հիրմնադրած «Երևան» կանանց կամերային երգչախումբը միակն է Հայաստանի երգչախմբային արվեստի պատմության մեջ, որը Հայաստանին բերեց է մեկ տասնյակից ավելի մրցանակներ, այդ թվում Գրան Պրի և առաջին մրցանակներ: Ա. Վերանյանը այժմ ապրում և ստեղծագործում է ԱՄՆ –ի Բոստոն քաղաքում: